दाङ देउखुरी , असोज-२० । दाङ जिल्लाको राप्ती गाउँपालिकाका अध्यक्ष प्रकाश विष्ट सरकारी सवारी साधन प्रयोगको चलनलाई तोड्दै आफ्नै विद्युतीय स्कुटरमा गाउँपालिकाभित्रका सबै कार्यसम्पादन र जनसम्पर्कका गतिविधिहरूमा आवतजावतको गतिबिधिले थप चर्चामा आएका छन् ।
गाउँपालिका बाहिरका लामो दूरीका यात्राबाहेक, पालिकाभित्रका बैठक, निरीक्षण, कार्यालयीय काम तथा जनभेटघाटजस्ता सबै गतिविधिमा उनी विद्युतीय स्कुटरमै पुग्ने गरेको पाइएको छ। उनको यो कार्यशैलीले असल एवम् सरल नेतृत्वको परिचय दिन थालेको छ।
आर्थिक मितव्ययितालाइ कायम गर्न, जनताको करको सम्मान गर्न र वातावरणमैत्री जीवनशैलीलाई प्रोत्साहन गर्न विद्युतीय स्कुटर प्रयोग गर्न थालिएको बताउँदै पद ठूलो भएर होइन, सोच ठूलो भएर नेतृत्व महान् हुन्छ,” “जनताको करको सम्मान, वातावरणको सुरक्षा र सादगीपूर्ण जीवनशैली नै नयाँ युगको नेतृत्वको मार्ग हो। जनप्रतिनिधि देखावटी होइन, उदाहरणीय हुनुपर्छ। सानो प्रयासले पनि ठूलो परिवर्तनको सुरुवात गर्न सकिने अध्यक्ष विष्टको भनाई छ ।
राप्ती गाउँपालिकाको अध्यक्षको यस्तो पहलले गाउँभित्रका अन्य जनप्रतिनिधि र कर्मचारीहरूलाई ऊर्जा–संवेदनशील, जिम्मेवार र व्यवहारिक नेतृत्वतर्फ प्रेरित गरेको स्थानीयवासीहरू बताउँछन्।
सरल स्वभावका धनी एवम् समान व्यवहारले गर्दा अध्यक्ष विष्टले राप्ती गाउँ पालिकालाई दाङ देउखुरीमा मात्र नभइ देशकै असल पालिकाको रुपमा चिरपरिचित गराएका छन् ।
