जेष्ठ २६, राजपुर । दाङ देउखुरीको राजपुर गाउँपालिका वडा नम्बर २ मटेरिया स्थित रात्री आविको यही जेष्ठ २५ गते सम्पन्न अभिभावक भेलाबाट धनिराम चौधरीको नेतृत्वमा विव्यस गठन गरिएको छ भने उक्त विद्यालयलाई अर्को विद्यालयमा मर्ज गर्ने सम्बन्धमा राजपुर गाउँपालिका शिक्षा समितिले गरेको निर्णयप्रती असन्तुष्टि व्यक्त गर्दै उक्त निर्णयको अस्विकार गर्ने निर्णय समेत पारित गरिएको पाइएको छ भने विद्यालय बचाउने प्रतिबद्धता , ७ सदस्यीय ज्ञापनपत्र र दवाब समिती गठन समेत गरेको छ।
स्थानीय जेष्ठ नागरिक तुल्सिराम भण्डारीको अध्यक्षतामा आयोजना गरिएको भेलामा स्थानीय गोपाल वली , तुल्सीराम भण्डारी ,ऋषिराम घिमिरे, साधना यादव लगायतले विद्यालय मर्ज गर्न नहुनेमा जोड दिदै मन्तव्य राखेका थिए ।
कार्यक्रमको सहजीकरण विद्यालयका प्रधानाध्यापक खिम बहादुर खत्रीले गरेका थिए।
यसैबिच यस सम्बन्धमा सम्बन्धित वडा राजपुर २ का वडा अध्यक्ष ओमप्रकाश यादव तथा शिक्षा शाखा प्रमुख बासुदेव खनालसङ्ग बुझ्दा यस विषयमा आगामी शिक्षा समितीको बैठकले आधिकारिक निर्णय दिने भनी बताएका छन् ।
यस अघि शैक्षिकसत्र २०८२ मा रहेका विद्यार्थी संख्यामा कमि देखिएका विद्यालयमा शैक्षिकसत्र २०८३ मा विद्यार्थी संख्या बढाउन सकिने अवस्था छ वा छैन ? छ भने कसरी र प्रति कक्षा कति बढाउन सकिन्छ? बढाउन सकिने योजना के छ ? विव्यस तथा समुदायको भुमिका के रहन सक्छ? लगायत उल्लेखित व्यहोराको पत्र राजपुर गाउँ शिक्षा समितीको २०८२/०८/१४ गतेको निर्णयमा आधारित रहि २०८२ साल माघ ०६ गते तत्कालीन प्रमुख प्रशासकिय अधिकृत रेमन्त बहादुर डाङ्गीद्वारा हस्ताक्षरित पत्रानुसार जानकारी गराईएको र शैक्षिकसत्र २०८२ मै आवश्यक छलफल विद्यालयमा समेत आयोजना गरिएको पाईएको छ ।
बिद्यालय मर्ज सम्बन्धी राजपुर गाउँ पालिकाले आधिकारिक परिपत्र सम्बन्धित बिद्यालयमा भने पठाएको पाइएको छैन् । आधिकारिक तरिकाले बाहिर सार्वजनिक गरेको समेत पाइएको छैन् ।
