दाङ देउखुरी , बैशाख -१२। दाङ देउखुरीको लमही क्षेत्रमा नाई (कपाल काट्ने) व्यवसाय गर्दै आएकाहरूले कपाल र दाह्री काट्दा लाग्ने शुल्क वृद्धि गरेका छन् ।
पछिल्लो समय पेट्रोलियम पदार्थमा भएको मूल्यवृद्धिले सबै क्षेत्रमा असर परेको र विगत आठ वर्षदेखि स्थिर रहेको शुल्क परिमार्जन गर्नुपर्ने अवस्था आएको भन्दै लमहीमा बसेको बैठकले नयाँ दर कायम गर्ने निर्णय गरेको नेपाल नाइसंघका अगुवा जगनारायण चौधरी (गुरु)ले जानकारी गराएका छन् ।
बैठकको निर्णयअनुसार गाउँघरमा पसल सञ्चालन गर्ने नाईहरूले कपाल र दाह्री काट्दा १३० देखि १५० रुपैयाँसम्म शुल्क लिन पाउनेछन् भने बजार क्षेत्रमा रहेका पसलहरूको हकमा १५० देखि २०० रुपैयाँसम्म शुल्क निर्धारण गरिएको छ ।
एसी जडान भएका पसलहरूमा भने २०० देखि २५० रुपैयाँसम्म शुल्क लाग्ने निर्णय गरिएको छ ।
