नेपालगञ्ज, बाँके – बाँकेको कोहलपुरस्थित एक पोलिक्लिनिकका सञ्चालक करणीसम्बन्धी कसूर (अभद्र व्यवहार/गैरकानुनी उपचार) को आरोपमा पक्राउ परेका छन्।
जिल्ला प्रहरी कार्यालय बाँकेका अनुसार कोहलपुर नगरपालिका वडा नं. ११, रेडक्रस रोडमा सञ्चालित थापा पोलिक्लिनिकमा उपचारका लागि गएकी एक बिरामी महिलामाथि अवाञ्छित तथा अभद्र व्यवहार (गोप्य अंग छोएको/चलाएको) गरेको भिडियो सामाजिक सञ्जालमा सार्वजनिक भएपछि प्रहरीले कारबाही अघि बढाएको हो।
पीडित पक्षबाट औपचारिक जाहेरी दरखास्त परेपछि प्रहरीले पोलिक्लिनिकका सञ्चालक ६३ वर्षीय गणेशबहादुर थापालाई नियन्त्रणमा लिएको छ।
प्रहरीको प्रारम्भिक छानबिनका क्रममा थापासँग स्वतन्त्र रूपमा बिरामीको उपचार गर्ने कानुनी इजाजत नभएको र उनी केवल सीएमए (CMA) प्रमाण-पत्रधारी मात्र रहेको खुलेको छ। उनले ‘नेपाल मेडिकल काउन्सिल, कोड अफ एथिक्स एण्ड प्रोफेसनल कन्डक्ट, २०१७’ को व्यवस्था विपरीत कार्य गरेको प्रहरीले जनाएको छ।
पक्राउ परेका थापामाथि जिल्ला अदालत बाँकेबाट करणी सम्बन्धी कसूरमा ७ दिनको म्याद थप गरी थप अनुसन्धान प्रक्रिया अगाडि बढाइएको जिल्ला प्रहरी कार्यालय बाँकेले जनाएको छ ।
