काठमाडौं । अख्तियार दुरुपयोग अनुसन्धान आयोगको टोलीले भक्तपुरको मध्यपुर थिमि नगरपालिकामा छापा मारेर घुस रकमसहित प्रमुख प्रशासकीय अधिकृत भोजराज घिमिरेलगायतका कर्मचारीलाई नियन्त्रणमा लिएको छ ।
अख्तियार दुरुपयोग अनुसन्धान आयोगले घिमिरेलाई नगरपालिकाबाट रंगेहात पक्राउ गरेको हो।
नगरपालिकामा घुस लेनदेन भइरहेको सूचनाका आधारमा सोमबार अख्तियारको टोली प्रहरीसहित पुगेको थियो ।
अख्तियार स्रोतका अनुसार छापा मार्ने क्रममा प्रमुख प्रशासकीय अधिकृत घिमिरेसहित केही कर्मचारीसमेत नियन्त्रणमा परेका छन् । टोलीले घटनास्थलबाट ३३ लाख रुपैयाँसमेत बरामद गरेको बताइएको छ ।
अख्तियार स्रोतका अनुसार घटनास्थलमा बरामद रकम र अन्य प्रमाणको मुचुल्का तयार गर्ने काम भइरहेको छ । घुस लेनदेन कुन कामसँग सम्बन्धित थियो भन्ने पनि खुल्न बाँकी छ ।
आवश्यक प्रक्रिया पूरा भएपछि नियन्त्रणमा लिइएका बाँकी कर्मचारी, बरामद रकम र घटनासम्बन्धी विस्तृत विवरण सार्वजनिक गरिने बताइएको छ । घटनाबारे थप अनुसन्धान भइरहेको छ । (अनलाईन नेपाल)
