दाङ देउखुरी । राप्ती नदीमा भैँसी तार्ने क्रममा बेपत्ता भएकी १६ वर्षीया बालिका मृत अवस्थामा फेला परेकी छन्।
दाङको राजपुर गाउँपालिकमा वडा नंम्बर ३ कालीपुरुवाका रामकुमार यादवको छोरी १६ का विद्यावती यादव मृत अवस्थामा फेला परेको जिल्ला प्रहरी कार्यालय दाङका प्रहरी प्रवक्ता डिएसपी ईश्वर थापाले जानकारी दिनुभयो।
यादव हिजो बुधबार साँझ ६ बजेतिर लमही नगरपालिका-८ दुईघरवाबाट भैँसी चराई घर तर्फ फर्किदै गर्दा राप्ती नदीमा भैँसी तार्ने क्रममा बगी बेपत्ता हुनुभएको थियो । यादव बगेर बेपत्ता भएको स्थानियले प्रहरीलाई खबर गरे पश्चात स्थानीयवासी र प्रहरी टोलीले खोजी प्रक्रिया सुरु गरेका डिएसपी थापाले बताउनुभयो।
बेपत्ता बालिकालाई खोजी गदै जाँदा आज बिहान साढे ८ बजेतिर लमही नगरपालिका ८ धनपुरुवा स्थित राप्ती नदीको बीचमा बालिकाको शव फेला परेको थापाले जानकारी दिनुभयो। घटनाको बारेमा थप अनुसन्धान भइरहेको प्रहरीको भनाई रहेको छ।
