दाङ । लुम्बिनी प्रदेशमा प्रदेश निजामती सेवा दिवस–२०८२ तीन दिनसम्म विभिन्न कार्यक्रमको साथ मनाइने भएको छ । भाद्र २० देखि २२ गतेसम्म रक्तदानदेखि वृक्षारोपण, अन्तरक्रिया, सरसफाइ, खेलकुद, परिसंवाद, प्रभातफेरी र सांस्कृतिक झाँकीसम्मका गतिविधि तय गरिएको छ ।
प्रदेश सरकार प्रमुख सचिव बावुराम अधिकारीको अध्यक्षतामा बसेको मूल समारोह समितिको बैठकले स्वास्थ्य मन्त्रालयको संयोजनमा भाद्र २० गते बिहान रक्तदान कार्यक्रमको शुरुवात गर्ने निर्णय गरेको छ भने उक्त दिन दिउँसो १ बजे “संघीयता कार्यान्वयनमा प्रदेश निजामती सेवाका अवसर र चुनौती” विषयक अन्तरक्रिया कार्यक्रम हुने भनिएको छ ।
यसैबीच भाद्र २१ गते बिहान प्रशासनिक परिसरमा वृक्षारोपण तथा सरसफाइ गरिने भनिएको छ भने २० र २१ गते खेलकुद प्रतियोगिता पनि सञ्चालन हुने जनाइएको छ।
भाद्र २२ गते प्रशासनिक संघीयता सम्बन्धी परिसंवाद, सांस्कृतिक झाँकीसहितको प्रभातफेरी र व्याण्डबाजा प्रदर्शन हुने कार्यक्रम तय गरिएको मुख्यमन्त्री कार्यालय स्रोतले जनाएको छ ।
२२ गतेका दिन बिहान ११ बजे प्रदेश निजामती सेवाका कर्मचारीहरूको प्रतिभा प्रस्तुतीकरण र मूल समारोह आयोजना गरिनेछ । उक्त अवसरमा उत्कृष्ट कर्मचारीलाई प्रदेश निजामती सेवा पुरस्कार समेत प्रदान गरिनेछ ।यस उपरान्त भाद्र २० देखि २२ गतेसम्म सबै मन्त्रालय र निकायमा दीपावली गर्ने निर्णय समेत गरिएको छ ।
