दाङ /राजपुर, भदौ -१८ । यही भदौ १० मा आएको रसुवा, नुवाकोट बाढीपहिरोजस्ता प्राकृतिक विपद्का कारण पीडामा परेका परिवारलाई सहयोग गर्ने उद्देश्यले दाङको राजपुर गाउँपालिका–३, खरदरियास्थित स्कुलको शंकर माविका विद्यार्थीहरूले रु. ६ हजार ७ सय २० सहयोग गरेका छन्।
आफ्नो दैनिक खाजाखर्चबाट सकेको रकम बचत गरी विद्यार्थीहरूले उक्त सहयोग रकम संकलन गरेका हुन्। विपदमा परेका नागरिकको दुःखमा आफूले पनि केही योगदान गर्नुपर्छ भन्ने भावनाका साथ विद्यार्थीहरूले स्वेच्छिक रूपमा रकम जुटाएका हुन्।
सानो उमेरमै विद्यार्थीहरूले देखाएको यो मानवीय संवेदना र सामाजिक उत्तरदायित्व प्रशंसनीय बनेको छ। उनीहरूको यो प्रयासले सहयोगका लागि ठूलो धनराशि होइन, पीडितको दुःख बुझ्ने ठूलो मन आवश्यक हुन्छ भन्ने सन्देश दिएको छ।
विद्यालय परिवारले पनि विद्यार्थीहरूको मानवीय कार्यको प्रशंसा गर्दै विपद्को समयमा पीडित परिवारको साथमा उभिनु सबैको साझा दायित्व भएको जनाएको छ।
विद्यार्थीहरूको यो सानो योगदान बाढीपीडितका लागि आर्थिक सहयोग मात्र नभई दुःखमा साथ दिने आत्मीयता र मानवताको सुन्दर उदाहरण बनेको छ.
