ओखलढुंगाको लिखु गाउँपालिका–९ मा सामाजिक सुरक्षा भत्ता वितरणमा व्यापक अनियमितता गरी राज्यको लाखौँ रकम हिनामिना गरेको आरोपमा अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेको छ।
आर्थिक वर्ष २०७५/७६ र २०७६/७७ मा सामाजिक सुरक्षा भत्ता वितरण गर्दा ठुलो आर्थिक अनियमितता भएको भन्दै अख्तियारले लामो अनुसन्धानपश्चात तत्कालीन प्रमुख प्रशासकीय अधिकृत, निमित्त प्रमुख प्रशासकीय अधिकृत, वडा अध्यक्ष र एमआईएस अपरेटरसहित पाँच जनाविरुद्ध आरोपपत्र दायर गरेको हो।
अख्तियारका अनुसार यस प्रकरणका मुख्य योजनाकार मानिएका तत्कालीन वडा अध्यक्ष शुकवीर तामाङले आफ्नो दायाँ हातको बुढीऔँलाको छाप ३६० पटकसम्म प्रयोग गरेर एक्लैले २९ लाख १५ हजार २०० रुपैयाँ भुक्तानी लिएको पाइएको छ।
अन्य प्रतिवादीहरूसँगको पूर्वसहमति र मिलेमतोमा सो रकम निकालिएको अख्तियारको दाबी छ। मृत्यु भइसकेका, बसाइँ सरेका वा नरहेका व्यक्तिहरूको नाममा समेत भत्ताको रकम निकालेर चरम लापरबाही र सरकारी कागजात तथा विवरणहरू हेरफेर गरिएको अनुसन्धानबाट खुलेको छ।
अख्तियारले भ्रष्टाचार निवारण ऐन, २०५९ बमोजिम सबै प्रतिवादीहरूबाट बिगो असुलउपर गर्न, बिगोबमोजिम जरिवाना तिराउन र कसुरको मात्रा हेरी कैद सजाय तथा सरकारी कागजात हेरफेर गरेको कसुरमा थप सजायको माग दाबी गरेको छ।
स्थानीय तहमा नागरिकको कल्याणका लागि पठाइने संवेदनशील रकममा नै यसरी मिलेमतो गरी व्यापक अनियमितता हुनुले स्थानीय सुशासन र पारदर्शितामाथि गम्भीर प्रश्न उठाएको छ।
