काठमाडौं । जाजरकोटको कुशे गाउँपालिका–२ स्थित मान्नेढुङ्गा माध्यमिक विद्यालयको पुस्तकालय अनुदान रकम हिनामिना गरेको आरोपमा अख्तियार दुरुपयोग अनुसन्धान आयोगले चार जनाविरुद्ध विशेष अदालतमा आरोपपत्र दायर गरेको छ।
आयोगका अनुसार आर्थिक वर्ष २०७३/७४ मा तत्कालीन जिल्ला शिक्षा कार्यालयबाट प्राप्त पुस्तकालय अनुदानबापतको रु. १७ लाख ४१ हजार ४४६ हिनामिना गरिएको अनुसन्धानबाट पुष्टि भएपछि बिहीबार विशेष अदालत, काठमाडौंमा मुद्दा दर्ता गरिएको हो।
मुद्दा दायर गरिएकाहरूमा विद्यालयका तत्कालीन प्रधानाध्यापक धनबहादुर सिंह, तत्कालीन विद्यालय व्यवस्थापन समिति अध्यक्ष हरिचन्द्र जैसी, तत्कालीन लेखा सहायक धीरेन्द्रबहादुर सिंह र तत्कालीन विद्यालय व्यवस्थापन समिति सदस्य जनकबहादुर नेपाली रहेका छन्।
पुस्तकालय व्यवस्थापनका लागि आएको बजेट विद्यालयका पदाधिकारी तथा कर्मचारीले नियमविपरीत सापटी लगेको तर लामो समयसम्म फिर्ता नगरेको भन्दै अख्तियारमा उजुरी परेको थियो।
उजुरीका आधारमा गरिएको अनुसन्धानका क्रममा चारै जनाले आपसमा मिलेमतो गरी सरकारी तथा सार्वजनिक संस्थालाई हानि-नोक्सानी पुर्याउने बदनियत राखेको पाइएको अख्तियारले जनाएको छ। उनीहरूले कानुनविपरीत ऋण सापटी लिएको कागजात बनाएर विद्यालयको बजेट गैरकानुनी रूपमा आपसमा बाँडेर लिएको अनुसन्धानबाट खुलेको छ।
सार्वजनिक सम्पत्तिको दुरुपयोग गरी रु. १७ लाख ४१ हजार ४४६ हिनामिना गरेको पुष्टि भएकाले उनीहरूमाथि भ्रष्टाचार निवारण ऐनबमोजिम कडा सजाय र हिनामिना भएको रकम असुलउपरको मागदाबी गर्दै आयोगले विशेष अदालतमा आरोपपत्र दायर गरेको हो।
