काठमाडौं, भदौ २३। सरकारले आज भदौ २३ गतेलाई ‘जेनजी शहीद दिवस’ का रूपमा मनाउँदै देशभर सार्वजनिक बिदा दिएको छ।
गत वर्ष भदौ २३ र २४ गते भएको जेनजी आन्दोलनका क्रममा ज्यान गुमाएका युवाहरूको योगदान र बलिदानको स्मरण तथा सम्मानस्वरूप सरकारले हरेक वर्ष भदौ २३ गते यो दिवस मनाउने निर्णय गरेको हो।
मन्त्रिपरिषद्को निर्णयअनुसार आज नेपालभर सार्वजनिक बिदा लागू भएको छ। दिवसका अवसरमा जेनजी आन्दोलनमा ज्यान गुमाएकाहरूलाई श्रद्धाञ्जली अर्पण गर्दै उनीहरूले उठाएका सवाल, आन्दोलनका उद्देश्य तथा प्राप्त उपलब्धिबारे स्मरण र चर्चा गरिने जनाइएको छ।
सरकारले २०८२ सालको भदौ २३ र २४ गते भएको आन्दोलनका क्रममा ज्यान गुमाएका व्यक्तिहरूलाई शहीद घोषणा गरिसकेको छ। उनीहरूको बलिदानको स्मरणमा भदौ २३ गतेलाई राष्ट्रिय रूपमा जेनजी शहीद दिवस का रूपमा मनाउने निर्णय गरिएको हो।
आजको दिनलाई केवल सार्वजनिक बिदाका रूपमा नभई युवाको आवाज, परिवर्तनको चाहना र बलिदानको स्मरण गर्ने दिनका रूपमा लिनुपर्ने सरोकारवालाहरूको धारणा छ।
