सम्पादकीय /टोपेन्द्र खनाल ✍️आगामी फागुन २१ गते निर्वाचन हुँदैछ। लोकतान्त्रिक अभ्यासको यो महत्वपूर्ण घडीमा राजनीतिक दल, उम्मेदवार, प्रचारक र मतदाता सबैको ध्यान जनताको निर्णयतर्फ केन्द्रित भएको छ। निर्वाचन उत्सव पनि हो, जिम्मेवारी पनि।
चुनावी प्रतिस्पर्धा स्वाभाविक हो, तर प्रतिस्पर्धा मर्यादित हुनुपर्छ। व्यक्तिगत आरोप, भ्रम र उत्तेजनाभन्दा नीति, योजना र कार्यदृष्टिकोण प्रस्तुत गर्नु नै स्वस्थ राजनीतिक संस्कार हो। शब्द संयमित हुँदा समाज शान्त रहन्छ र मतदाता स्वतन्त्र निर्णय गर्न सक्षम हुन्छन्।
निर्वाचन परिणाम जे भए पनि जनमतको सम्मान गर्नु सबैको कर्तव्य हो। जित्नेले नम्रता र उत्तरदायित्व देखाउनुपर्छ भने हार्नेले लोकतान्त्रिक भावनालाई स्वीकार्नुपर्छ। विश्वासको राजनीति व्यवहारबाट निर्माण हुन्छ, भाषणबाट मात्र होइन।
यस संवेदनशील घडीमा सबै पक्ष संयमित, जिम्मेवार र सन्तुलित बन्न सक्नुपर्छ भन्ने हाम्रो आग्रह हो।
