काठमाडौं । देशभर आज असोज १ गते बिहीबार विश्वकर्मा पूजा तथा वास्तु दिवस मनाइएको छ।
कलकारखाना, उद्योग, व्यवसायिक प्रतिष्ठान, निर्माण क्षेत्र तथा विभिन्न कार्यस्थलमा प्रयोग हुने मेसिन, औजार र उपकरणको पूजा गर्दै विश्वकर्मा पूजा मनाइएको हो।
भगवान् विश्वकर्मालाई वास्तुकला, निर्माण तथा शिल्पकलाका अधिष्ठाता देवताका रूपमा श्रद्धा गरिन्छ। यस अवसरमा उद्योगी, व्यवसायी, श्रमिक तथा कालिगढहरूले आफ्नो कर्मक्षेत्रको सुख, शान्ति, समृद्धि र प्रगतिको कामना गर्दै पूजा आराधना गरेका छन्।
विश्वकर्मा पूजाका दिन सवारीसाधन, मेसिनरी तथा निर्माण कार्यमा प्रयोग हुने सामग्रीको समेत विशेष पूजा गर्ने परम्परा रहेको छ।
